MYOS AIMANDO MAPIA MYOS BEKON RO SOREN MBRUR - Manfasramdi
Skip to content Skip to sidebar Skip to footer
Home / Fasfas ro Wos Byak

MYOS AIMANDO MAPIA MYOS BEKON RO SOREN MBRUR

By Manfasramdi Post a Comment

KOFAWI baim mansei besun ma bekon randak kaku ro Mios Mapia inensya, mboi ro manfasfas sarisa sya, wos ma fasfas nasya bekofenbair er bero myos mawa inensya. Ro taun 1537 M, snonggaku Spanyol benir Hernando de Grijalva ma Hernán Cortés suyayun ro Samudra Pasifik kuker wai Santiago ma skosrow mios ine, inja sor myos ine be GÜEDES.  Ro taun ani kako skomamun-mun ro wai yabori rawo Hernando de Grijalva imar, sordade byesi smuni. 

Ro paik Ayundi (oktober), ras (tanggal) 12, wampasi wambarek (taun) 1767, Kapten Carteret daksrow myos anna ro Samudra Hindia Timur. Wai sayun kuker ine snori “Swallow”. Ma ifyafer ro dia snonggaku sisya sbarek rodia kwar.  Inja, sadoma sfamfar kawasa ansi. Ro fafisu anya, bekain ro diansya sor mios anskoya be Pegan, Onata, ma Onella. Myos anskoine rep wonon nadwarek si. Onata ma Onella nkain be bar Wamurem ma bar Wambarek ma Pegan nkain indokada mil risuru ro bar Wambrur mios ansuya. Kawasa bebarek rodiansya sifrurpyum ma sesyowi inja sfarobek abrui faro mankarmon mawa na.    

Smam mankarmom nane be robena robaido roi bekakur.  Inja, KARTERET kyara na skokobes pres roi bero mios anna. Snonkaku ansi sisnai be snonkaku Indian sya, baken sena rya kansai, pik sena npaisem namyaren ma nakwane. Nakor sena napyoper ma nepyom; sispak kaku, sekir ma sisambrab. Sima sesyowi ko fafisu kosrow randak si. Ro sifer sena roi bekawef nasya fa nadwarek si robaido sepake monda mar. Wai sena kako sperempyum na, sifrur waibaken ma skarsen pyumna, sifrur ayun ma manjaw ro bandibar wai ine imnis Wai Karambow ma pam nakako nasya. 

Skomindi syewar fa byarkus awak kapal, benir be Joseph Freewill. Kawasa bero myos aninensya sfawar be Mandaman Eropa sya bo sobo ro bar Wambrur (kyur be myos Byak-Supyori) snonkaku ansi sna mankarmom, srak ma smun kawasa bero myos Mapia sya fyor sisrow siro soren.  Myos ine kako sor nabe Freewill robaido St. David snar berama ro myos ine snori Joseph Freewill.  

Ro papupes abad bebe-19 ya, perjanjian Spanyol setandatangani na namnai. Inja, mios mawa inensya isoine Mikronesia Spanyol ro Oceania ro bab papoik sena kaker ma isof ro 1948.

Post a Comment for " MYOS AIMANDO MAPIA MYOS BEKON RO SOREN MBRUR"

Post a Comment